ಕಣ ಕಣಾ. . . 

ಮೊದಲೊಂದು ಕಣ, ಕೊನೆಗೊಂದು ಹೆಣ

ಸಾಗುವುದು ನಡುವೆ ಜೀವನವು ಕಣಾ

ಪಡೆದು ಬೆಳೆದು ಕೋಟಿ ಜೀವ ಕಣ 

ಕಣದಿಂದಲೇ ಜನನ, ಕಣದಿಂದಲೇ ಹನನ

ಯೋಗ ರೋಗಗಳೆರಡೂ ಕಣದ ಕಾರಣ ಕಣಾ

ವ್ರಣವಾಗದು ಗುಣ ಇರದಿರೆ ಕಣದ ಋಣ

ಜೀವಕಣದ ಕಥೆ ಬರೆಯುವುದು ಜೀನು ಕಣಾ 

ಎಂದೋ ಸ್ಫೋಟಿಸಿತು ಒಂದೇ ಒಂದು ಕಣ

ಇಂದೋ ಅಗಣಿತ ತಾರಾಗಣ

ಇಲ್ಲಿ ನಾನಾರು ನೀನಾರು 

ಬಿರಿದುದುರಿ ಹೋಗುವ 

ಬರಿಯೊಂದು ಕಣ ಕಣಾ

ಕಾಣಲಾರದ ಕಣಗಳೆದುರು ಸೋಲುವುದು 

ನೂರಾನೆಗಳ ಬಲದ ಬಣವು ಕಣಾ

ಕಣದ ಚರಣಕೆರಗುವುದು ನಮ್ಮ ಹಣೆಬರಹವು ಕಣಾ 

ಕಣಗಳನು ಹೋರಾಡಿ ಮಣಿಸಬಲ್ಲ ರಣ

ವಿಕ್ರಮ ಇನ್ನೂ ಹುಟ್ಟಿಲ್ಲ ಕಣಾ

ಕಣದ ಗುಣ ನಮ್ಮನು ಬಿಡದು ಕಣಾ

ಕಣಗಳಿಗೆ ಲೆಕ್ಕವಿಲ್ಲ ಗಣಗಳಂತೆ ಲಕ್ಷ್ಯವಿಲ್ಲ

ಕಣಗಳಿಲ್ಲವಾದರೆ ಜಗವು ಬಣಬಣ 

ಕಣಗಳಿಂದಲೇ ಬಾಳು ಝಣ ಝಣ 

ಕಣಗಳನು ಕಾಂಬ ತಂತ್ರಜ್ಞಾನ 

ಕರಗತವು ಕಣಾ 

ಕಣಗಳ ಮರ್ಮವನರಿಯುವ

ತತ್ತ್ವಜ್ಞಾನ ಪರಿಮಿತವು ಕಣಾ 

ಕಣಗಳೊಳಗಿನ ಒಗ್ಗಟ್ಟು ಮುರಿದ ದಿನ

ಜಗವು ಇನ್ನಿಲ್ಲವಾಗುವುದು ಕಣಾ

ಇದ್ದರೂ ಇರಲಾರದದು 

ಈ ಪರಿಯಲಿ ಕಣಾ

('ತುಷಾರ' , ಜೂನ್ 2023 ರಲ್ಲಿ ಪ್ರಕಟ)