ಸುತ್ತ-ಮುಕ್ತ 

 

  ಇಂಚರದಲಿ ಅಮರತ್ವ ಪಡೆದ ಫೀನಿಕ್ಸ್ ಹಕ್ಕಿಗಳು

 

ಕಾಡಿಲ್ಲದೆ ನಾಡಿಲ್ಲ. ಆದರೆ ಅಮೆಜಾó ನ್‍ನಲ್ಲಿ ಪ್ರತಿ ನಿಮಿಷ ಒಂದು ಫೂಟ್ಬಾಲ್ ಆಟದ ಮೈದಾನದಷ್ಟು ಮಳೆಕಾಡು ಅಳಿದು ಹೋಗುತ್ತಿದೆಯೆಂದಾದಲ್ಲಿ, ವಿಶ್ವದಾದ್ಯಂತ ನಿತ್ಯ ನಾಶವಾಗುತ್ತಿರುವ ಕಾಡಿನ ಅಳತೆ ಊಹಿಸಿದರೆ ಆತಂಕವಾಗದಿರದು.

 ಸಹಸ್ರಾರು ವರ್ಷಗಳಿಂದ ವನಸಿರಿಯನ್ನು ಸುಡುತ್ತಾ, ಅರಣ್ಯ ನಾಶಕ್ಕೆ ಒಂದು ಕಾರಣವಾಗಿರುವ ವಿಶ್ವವ್ಯಾಪಿ ಕಾಳ್ಗಿಚ್ಚು,  ಮುಂದುವರಿದ ದೇಶಗಳು ಕೂಡಾ  ಮಂಡಿಯೂರುವಂತೆ ಮಾಡಬಲ್ಲದು. ಕ್ಯಾಲಿಫೋರ್ನಿಯದಲಂತೂ ಒಂದು ಋತು ಅನ್ನುವಷ್ಟು ಸರ್ವೇಸಾಮಾನ್ಯವೆನಿಸಿದ ಈ ಕಾಳ್ಗಿಚ್ಚು, 2021ರಲ್ಲಿ, ಮೂರು ತಿಂಗಳು ಕಾಡನ್ನು ಧಗಧಗಿಸಿ, 26 ದಶಲಕ್ಷ ಎಕರೆ ವನಸಂಪತ್ತನ್ನು ಸುಟ್ಟು ಹಾಕಿತ್ತು.

ಕಾಳ್ಗಿಚ್ಚುಗಳನ್ನು ಕ್ರೌನ್ ಫೈರ್ಸ್, ಲ್ಯಾಡರ್ ಫೈರ್ಸ್, ಗ್ರೌಂಡ್ ಫೈರ್ಸ್ ಹಾಗೂ ಸರ್ಫೇಸ್ ಫೈರ್ಸ್ ಎಂದು ವಿಂಗಡಿಸಲಾಗಿದೆ. ಬಿರುಗಾಳಿ, ಅತೀ ತಾಪಮಾನ, ಕಡಿಮೆ ತೇವಾಂಶ, ಸಿಡಿಲು, ಭೂಪ್ರದೇಶದ ಗುಣಲಕ್ಷಣ ಮುಂತಾದವು ಕಾಳ್ಗಿಚ್ಚುಗಳು ಹರಡಲು ಕಾರಣವಾದರೂ 80-90% ಕಾಳ್ಗಿಚ್ಚುಗಳ ಹುಟ್ಟಿಗೆ; ಕ್ಯಾಂಪ್ ಫೈರ್ಸ್, ವಿದ್ಯುತ್ ತಂತಿ, ಸಿಗರೇಟ್ ತುಂಡು ಹಾಗೂ ದುಷ್ಕರ್ಮಿಗಳು ಹಚ್ಚುವ ಬೆಂಕಿ ಇತ್ಯಾದಿ ರೂಪದಲ್ಲಿ ಮಾನವನೇ ಕಾರಣ ಅನ್ನುವುದು ಆಘಾತಕಾರಿ. 2015ರಲ್ಲಿ ಇಂಡೋನೇಷ್ಯಾದ ತಾಳೆಎಣ್ಣೆ ಕಂಪನಿಯೊಂದರ ಕೃಷಿ ಭೂಮಿ ವಿಸ್ತರಿಸುವ  ಮಹತ್ವಾಕಾಂಕ್ಷೆ, 18 ದಶಲಕ್ಷ ಅರಣ್ಯ ಭೂಮಿ, ಪಶು ಪಕ್ಷಿಗಳನ್ನು ಸುಟ್ಟು ಹಾಕಿತು, ನೆರೆಯ ರಾಷ್ಟ್ರಗಳಲ್ಲಿ ಕೂಡಾ ಉಸಿರಾಟದ ತೊಂದರೆ, ಅನಾರೋಗ್ಯ ಉಂಟು ಮಾಡಿತು ಹಾಗೂ 19 ಅಗ್ನಿಶಾಮಕ ಸಿಬ್ಬಂದಿಗಳ ಬಲಿ ಪಡೆಯಿತು.

ಆದಾಗ್ಯೂ ಕೆಲವು ವೃಕ್ಷ ಪ್ರಭೇದಗಳು ನಿರಂತರವಾಗಿ ಜೀವಿಸಿರಲು ಕಾಳ್ಗಿಚ್ಚುಗಳು ಅಗತ್ಯ. ಕೆಲವು ರೀತಿಯ ಮರಗಳ ಬೀಜಗಳು ಅವುಗಳ ಶಂಕು ಆಕೃತಿಯ ರಚನೆಗಳಲ್ಲಿ ಸಂರಕ್ಷಿತವಾಗಿರುತ್ತವೆ ಮತ್ತು ಬೆಂಕಿಗೆ ಅವು ಬಿರಿಯುತ್ತವೆ! ನಿಯಮಿತ ಜೀವನ ಚಕ್ರ ಕ್ರಮಿಸಲು ಬೆಂಕಿಯನ್ನು ಅವಲಂಬಿಸುವ ಮರಗಳಿವೆ. ಕೆಲವು ಮರಗಳಿಗೆ ವರ್ಷದಲ್ಲಿ ಕೆಲವೊಮ್ಮೆ, ಇನ್ನು ಕೆಲವಕ್ಕೆ ಶತಮಾನದಲ್ಲಿ ಕೆಲವೊಮ್ಮೆ, ಬಾಳಿ ಬದುಕಲು ಕಾಡಿನ ಬೆಂಕಿ ಅತ್ಯಗತ್ಯ. ಕ್ರಿಮಿ ಕೀಟಗಳನ್ನು ಕೊಲ್ಲುವ, ರೋಗ ರುಜಿನುಗಳನ್ನು ಮಟ್ಟಹಾಕುವ ಕಾಡಿನಬೆಂಕಿ ಅಲ್ಲಿನ ಒಟ್ಟು ಪರಿಸರವನ್ನು ಆರೋಗ್ಯಕರವಾಗಿರಿಸುತ್ತದೆ. ಕಾಡಿನ ಪೊದೆ ಹಾಗೂ ಕುರುಚಲು ಗಿಡಗಳನ್ನು ಅಳಿಸಿ ಹೊಸದಾದ ಹುಲ್ಲು, ಗಿಡಮೂಲಿಕೆಗಳು ಹಾಗೂ ಹೊದರುಗಳಿಗೆ ಎಡೆ ಮಾಡಿ ಕೊಡುವ ಕಾಡಿನ ಬೆಂಕಿ ಆ ಮೂಲಕ ಮೃಗಗಳಿಗೆ ಹಾಗೂ ಪಕ್ಷಿಗಳಿಗೆ ಆಹಾರ ಹಾಗೂ ಆಶ್ರಯ ಒದಗಿಸುತ್ತವೆ. ಅವಶೇಷಗಳನ್ನು ನಿವಾಳಿಸಿ ತೆಗೆವ ಬೆಂಕಿ, ಬಿಸಿಲು ನೆಲದ ಮೇಲೆ ಬೀಳಲು ನೆರವಾಗಿ ಸಣ್ಣ ಪುಟ್ಟ ಗಿಡಮರಗಳನ್ನು ಪೋಷಿಸುತ್ತದೆ ಮತ್ತದು ದೊಡ್ಡ ಮರಗಳ ಬೆಳವಣಿಗೆಗೆ ಸಹಾಯಕವಾಗುತ್ತದೆ. ಎಲ್ಲಾ ಕಾಡಿನ ಬೆಂಕಿಯನ್ನು ಪೂರ್ತಿ ಹತ್ತಿಕ್ಕುವುದು ಕೂಡಾ, ಅವಶೇಷಗಳು ಹಾಗೂ ಪೊದೆ ಮತ್ತು ಕುರುಚಲಿನ ಅಡ್ಡಾದಿಡ್ಡಿ ಬೆಳವಣಿಗೆಗೆ ಕಾರಣವಾಗಿ, ಕಾಳ್ಗಿಚ್ಚುಗಳ ಹೆಚ್ಚಳಕ್ಕೆ ಇಂಬುಗೊಡುತ್ತಿರುವುದು ವಿಪರ್ಯಾಸವೆನಿಸಿದೆ.

ಕಾಳ್ಗಿಚ್ಚುಗಳ ಮಟ್ಟಿಗೆ, ಆಸ್ಟ್ರೇಲಿಯಾದ್ದು ಕರಾಳ ಇತಿಹಾಸ. ಆದರೆ 2019ರ ಸೆಪ್ಟೆಂಬರ್‍ನಿಂದ 2020ರ ಜನವರಿವೆರೆಗೆ ಆಸ್ಟ್ರೇಲಿಯಾದ ನ್ಯೂ ಸೌತ್ ವೇಲ್ಸ್ ಹಾಗೂ ವಿಕ್ಟೋರಿಯಾ ಪ್ರಾಂತ್ಯಗಳನ್ನು ಹಾಗೂ ಕ್ಯಾಂಗರೂ ದ್ವೀಪವನ್ನು ಕಾಡಿದ ಕಾಳ್ಗಿಚ್ಚು ಮಾಡಿದ ವಿಕೋಪ ಐತಿಹಾಸಿಕ. ಸುಮಾರು 27 ಎಕರೆ ಕಾಡನ್ನು ನಾಶ ಮಾಡಿದ ಆ ದಾವನಲ, ಆಸ್ಟ್ರೇಲಿಯಾದ ಸಾಂಸ್ಕøತಿಕ ಲಾಂಛನಗಳಾದ ಕ್ಯಾಂಗರೂಗಳು ಮತ್ತು ಕೊವೋಲಗಳು ಸೇರಿ, 100 ಕೋಟಿ ಪಶು ಪಕ್ಷಿಗಳನ್ನು ಬಲಿ ಪಡೆಯಿತು..

ಈ ವಿನಾಶಕಾರಿ ಕಾಳ್ಗಿಚ್ಚಿನ ತರುವಾಯ ಅಲ್ಲಿ ಕಾಡಿಗೆ ಕಾಡೇ ಅಸಹನೀಯ ಮೌನಕ್ಕೆ ಶರಣಾಯಿತು. ಬಾರದ ಲೋಕಕ್ಕೆ ಹಾರಿದ ಹಕ್ಕಿಗಳು, ಜೀವಂತ ಚಿತೆಗೇರಿದ ಪ್ರಾಣಿಗಳು, ವಾಸಾಸ್ಥಳ  ಕಳೆದುಕೊಂಡು ಅಲೆದಾಡುವಂತಾದವು ಲೆಕ್ಕವಿಲ್ಲದಷ್ಟು. ಇಂದು ಅಲ್ಲಿನ 25%ನಷ್ಟು ಪಕ್ಷಿ ಪ್ರಭೇದಗಳು ನಶಿಸಿ ಹೋಗುತ್ತಿರುವ ಜೀವಸಂಕುಲಗಳ ಪಟ್ಟಿಗೆ ಸೇರಿವೆ, ಪ್ರತಿ ಆರರಲ್ಲಿ ಒಂದು ಹಕ್ಕಿ ಅಪಾಯದ ಅಂಚಿನಲ್ಲಿದೆ.

ಇವೆಲ್ಲದರ ನಡುವೇಯೇ, ಸುಮಾರು 50 ಹಕ್ಕಿಗಳ ಇಂಚರವನ್ನು ಧ್ವನಿ ಮುದ್ರಿಸಿಕೊಳ್ಳುವ ಘನ  ಕಾರ್ಯವನ್ನು ಕೈಗೊಳ್ಳಲಾಯಿತು ಅನ್ನುವದು ವಿಶೇಷ. ಮತ್ತು ಆ ಆಲ್ಬಮ್, ಆಸ್ಟ್ರೇಲಿಯಾದ ಅರಿಯಾ (ಆಸ್ಟ್ರೇಲಿಯನ್ ರೆಕಾರ್ಡಿಂಗ್ ಇಂಡಸ್ಟ್ರಿ ಅಸೋಸಿಯೇಷನ್)ದ ಮ್ಯೂಸಿಕ್ ಚಾರ್ಟ್‍ಗಳಲ್ಲಿ, ಸದಾ ಜನಪ್ರಿಯವೆನಿಸಿದ ಟೈಲರ್ ಶ್ವಿಫ್ಟ್‍ನಂಥಾ ದಿಗ್ಗಜಳನ್ನು ತಳ್ಳಿ ಹಾಕಿ, ಟಾಪ್ 5ನಲ್ಲಿ ಸ್ಥಾನ ಗಿಟ್ಟಿಸಿ ಕೊಂಡದ್ದು ಇನ್ನೊಂದು ದಾಖಲೆ.  

ಕೊಕಟೂಗಳ (ಜುಟ್ಟುಳ್ಳ ಗಿಣಿ) ಸಮೂಹಗಾನ, ಬೊವ್‍ ಬರ್ಡ್‍ ಗಳ ಮಣಿನಾದ, ಕಡಲಹಕ್ಕಿಗಳ ಸಿಂಫನಿ, ಬದುಕುಳಿದ ಏಕೈಕ ರಾತ್ರಿಗಿಳಿಯ ಮನವ ಕಾಡುವಂಥ ಆರ್ದ್ರ ಮೊರೆ-ಇವೆಲ್ಲವೂ ‘ಬರ್ಡ್ ಲೈಫ್ ಆಸ್ಟ್ರೇಲಿಯಾ’ ನಿರ್ಮಿಸಿದ ‘ಸಾಂಗ್ಸ್ ಆಫ್ ಡಿಸೆಪೀಯರೆನ್ಸ್’ ಶೀರ್ಷಿಕೆಯ ಆ ಧ್ವನಿಮುದ್ರಿಕೆಯಲ್ಲಿ ಗೂಡು ಕಟ್ಟಿವೆ.

 ಪಶುಪಕ್ಷಿಗಳ ಸಂಗೀತ, ಚಾರ್ಟ್‍ಗಳಲ್ಲಿ  ಟಾಪ್ ಅನಿಸಿಕೊಳ್ಳುವುದು ಇದು ಮೊದಲೇನಲ್ಲ. 70ರ ದಶಕದಲ್ಲಿ ‘ಸಾಂಗ್ಸ್ ಆಫ್ ದ ಹಂಪ್ ಬ್ಯಾಕ್ ವೇಲ್’ ಶೀರ್ಷಿಕೆಯಡಿ   ರೆಕಾರ್ಡ್ ಮಾಡಲಾಗಿದ್ದ ಡುಬ್ಬವುಳ್ಳ ತಿಮಿಂಗಿಲಗಳ ಸುದೀರ್ಘ ಗಾಯನದ ಆಲ್ಬಮ್ ಒಂದು, ಸುಮಾರು ಒಂದು ಲಕ್ಷದಷ್ಟು ಮಾರಾಟವಾಗಿತ್ತು. ಅದಕ್ಕಿಂತಲೂ ಮುಖ್ಯ ಈ ಆಲ್ಬಂ ‘ಸೇವ್ ದ ವೇಲ್ಸ್’ ಅಭಿಯಾನಕ್ಕೆ ತಿದಿಯೊತ್ತಿತು ಮತ್ತು ತಿಮಿಂಗಿಲಗಳನ್ನು ವಾಣಿಜ್ಯ ಉದ್ದೇಶಗಳಿಗಾಗಿ ಬೇಟೆಯಾಡುವುದರ ಮೇಲೆ 10 ವರ್ಷಗಳ ಕಾಲ ವಿಶ್ವವ್ಯಾಪಿ ತಾತ್ಕಾಲಿಕ ತಡೆಯೊಡ್ಡುವಲ್ಲಿ ಯಶಸ್ವಿಯಾಯಿತು.

ಈ ‘ಕಣ್ಮರೆಯ ಹಾಡುಗಳು’ಅರಣ್ಯ ರೋದನವಾಗದೆ, ಅಳಿದುಳಿದ ಪಶು ಪಕ್ಷಿಗಳ ಸಂರಕ್ಷಣೆಗೆ ಪ್ರೇರಣೆಯಾಗಲಿ.