ಮಂಕು ತಿಮ್ಮನ ರಸ್ತೆ

 

ನಡೆಯುತ್ತೇನೆ ಮಂಕು

ಕವಿದ  ವನ   ಹಾಗೆ

ಮಂಕು ತಿಮ್ಮನ ರಸ್ತೆಯಲಿ

 

ಇದು ಗಾಂಧಿ ಬಜಾರು

 

ಹಿಂದೆ ಇಲ್ಲಿ ಎದುರಾಗುತ್ತಿದ್ದರು

ನಡೆದಾಡುವ ಕಾವ್ಯ ನಿಸಾರರು

ಧುತ್ತನೆ ಮತ್ತದೇ ಬೇಜಾರು

ಕಳೆಯಲು ಸಂಜೆ ಬರುತಿದ್ದವರು

 

ಠಾಕು ಠೀಕು ಅದೇ ಕೋಟು ಪ್ಯಾಂಟು

ಅವರದ್ದು ಇಂಗ್ಲಿಷು

ಕಾವ್ಯ ಸುರಿಸುವ ದಿರಿಸು

ನಗು ಬೀರುವ ಕನ್ನಡ

ಮನಸು ಗಾಂಧಿ ಬಜಾರು

 

ಮಾಸದ ಲಾಸ್ಯದ ನಿತ್ಯೋತ್ಸವದ ಕವಿಗೆ

ತೆರಳಿದ ಬಾಹ್ಯಲೋಕವೂ 

ಅರಳುವ ಕಾವ್ಯಲೋಕವು

 

ಇನ್ನೂ ಹಿಂದೆ ಶಿಸ್ತಿನಿಂದ

ನಿತ್ಯ ನಡೆದು ಬಂದ

ಕನ್ನಡದ ಚರಾಸ್ತಿ ಮಾಸ್ತಿಯವರ

ಪಾದಸ್ಪರ್ಶಕೆ ಪಾವನವಾದ

ಪುಳಕಗೊಂಡ ರಸ್ತೆಯಿದು

 

ಅವರ ಕೈಗೆ ಕೊಡೆಯ ನಂಟು

ಕಂಡ ಕಂಡ ಮಕ್ಕಳಿಗೆ ಕೊಡಲು

ಅವರ ಜೇಬಲ್ಲಿ ಪೆಪ್ಪರುಮಿಂಟು

 

ಅವರ ನಡಿಗೆಯ ಧನ್ಯದೃಶ್ಯ

ಕಾಣದವರಿಗೂ ಅಡಿಗಡಿಗೆ

ಕಲ್ಪನೆಯಲಿ ಅದು ಬರುವುದುಂಟು

 

ಅವರು ನಡೆಯದ ದಿನ

ರಸ್ತೆಯೂ ಅಳುವುದನ

ಕಂಡವರುಂಟು

ಗಾಂಧಿ ಸಾಹಿತಿ ಆದಂತೆ

ಒಂದು ದಂತ ಕತೆ ಮಾಸ್ತಿ

ಅನಿಸುವುದುಂಟು

 

ಸುಮ್ಮನಲ್ಲ ಅವರು ಹೆಜ್ಜೆಹಾಕಿದ

ಬಡಾವಣೆ ಗಾಂಧಿ ಬಜಾರು

ಖಾದಿ ಭಂಡಾರ, ಡಿವಿಜಿ ಕನಸಿನ

ಗೋಖಲೆ ಸಂಸ್ಥೆಗಳೇ ಕುರುಹು     

 

ಡಿವಿಜಿ ರಸ್ತೆ ಬಿಟ್ಟು ನಡೆದರೆ

ಹೆಚ್ಚು ದೂರವೇನಿಲ್ಲ

ಕನ್ನಡಿಗರ ಅವಕೃಪೆಗೆ ಒಳಗಾದ

ಅನಕೃ ಹೆಸರಿನ ಪಾರ್ಕು

ನರಸಿಂಹಯ್ಯನವರ ಕರ್ಮಭೂಮಿ

ನ್ಯಾಷನಲ್ ಕಾಲೇಜು

 

ವರ್ಷ ವರ್ಷ ಕಡಲೆ ಕಾಯಿ ಪರಿಷೆ

ನಡೆವ ಬಸವನಗುಡಿಯಿಂದ ಇಳಿದರೆ

ತಲುಪುವ ರಸ್ತೆ ಡಿವಿಜಿ ಹೆಸರಿಗಷ್ಟೆ

 

ಇಲ್ಲಿ ಇವತ್ತು ಐವತ್ತು ನೂರು

ಅಡಿಗಳಿಗೊಂದು ದರ್ಶಿನಿ ಹೋಟೆಲು

ತಿಂಡಿಪೋತರ ದಂಡು

ಬಳಕೆದಾರರ ಹಿಂಡು

ಉದಾತ್ತ ತತ್ತ್ವಗಳ ಅಣಕವಾಡು

ಇನ್ನೆಲ್ಲಿಯ ಗಾಂಧಿ?

ಇದು ಬರಿ ಬಜಾರು

 

ಆರದ ದೀವಿಗೆ ಅಗಲಿದ ಡಿವಿಜಿ

ಎಲ್ಲ ಕಾಲಕ್ಕೂ ಸಲ್ಲುವಂತಹ ಕಗ್ಗ

ಅಂದಕಾಲತ್ತಿಲೇ ಬರೆದವರು

 

ಹಾಕಿಕೊಟ್ಟ ಹಾದಿಯಲಿ ನಡೆÀಯಲಾರೆ

ಅವರ ಹೆಸರಿಟ್ಟ ರಸ್ತೆಯನು ಮಾತ್ರ

ತೊರೆಯಲಾರೆ, ಮರೆಯಲಾರೆ

                  

(‘ತುಷಾರ’ ಜುಲೈ 2022ರ ಸಂಚಿಕೆಯಲ್ಲಿ ಪ್ರಕಟ)