‘ಈ ಪರಿಯ ಸೊಬಗು’ ಇನ್ನಾವ ಬಸವನಹುಳುವಿನಲ್ಲಿದೆ?

 

ರೂಪವೇ ಸರ್ವಸ್ವವಲ್ಲ. ಅದುವೇ ಮುಖ್ಯವಲ್ಲ. ಸೌಂದರ್ಯದ ಆಕರ್ಷಣೆ ಕ್ಷಣಿಕ. ಗುಣ, ಸ್ವಭಾವ, ನಡತೆ, ಪ್ರತಿಭೆ ಇವುಗಳೆದುರು ಬಾಹ್ಯ ಸೌಂದರ್ಯ ಗೌಣವೆನಿಸುತ್ತದೆ.

ಇವೆಲ್ಲಾ ತಿಳಿದಿದ್ದರೂ ರೂಪಕ್ಕೆ ಮರುಳಾಗದವರು ವಿರಳ. ಗಲ್ಲಿ ಗಲ್ಲಿಗಳಲ್ಲೂ ತಲೆಯೆತ್ತಿರುವ ಬ್ಯೂಟಿ ಪಾರ್ಲರ್‍ಗಳು ಇದಕ್ಕೆ ಒಂದು ಉತ್ತಮ ಸಾಕ್ಷಿ. ಸೌಂದರ್ಯದ ಮೋಹಪಾಶ ಋಷಿ, ಮುನಿಗಳನ್ನೂ ಬಿಟ್ಟಿಲ್ಲ. ಮೊದಲ ನೋಟದಲ್ಲೇ ಮೊಳಕೆಯೊಡೆಯುವ ತರುಣ ತರುಣಿಯರ ನಡುವಿನ ಪ್ರೇಮ ಬಾಹ್ಯ ಸೌಂದರ್ಯದ ಕೈವಾಡ. ‘ಪೆಹಲಾ ನಶ’ ಇಳಿದು ವಾಸ್ತವ ಸ್ಪಷ್ಟವಾದಾಗ ಪ್ರೇಮದ ಸಮಾಧಿಯಾಗಿರುತ್ತದೆ. ಆದರೆ ಆ ಮಧುರ ಅನುಭವ ಜೀವನಪೂರ್ತಿ ಚೇತೋಹಾರಿಯಾಗಿ ಕಾಡುತ್ತಿರುತ್ತದೆ, ಮನವನು ಉಲ್ಲಾಸಗೊಳಿಸುತ್ತದೆ. ರೂಪ, ಲಾವಣ್ಯದ ಕರಾಮತ್ತು ಅದು.           

    ಸೌಂದರ್ಯಾನುಭೂತಿಗೆ ಏನೋ ಒಂದು ಉದ್ದೇಶ ಇದೆ. ಪ್ರಕೃತಿದತ್ತವಾದ ಹೂವು, ಪಕ್ಷಿ, ಪತಂಗ, ಮಳೆಬಿಲ್ಲುಗಳ ವರ್ಣಸಂಯೋಜನೆ, ವಿನ್ಯಾಸ, ಚಿತ್ತಾರಗಳಿಂದ ಸಮ್ಮೋಹಗೊಳ್ಳದಿರುವುದು ಅಸಾಧ್ಯ. ಈ ಪವಾಡವೇ ಇರಬೇಕು, ದೇವರ ಸ್ವಂತ ನಾಡೆಂದು ಕರೆÀಯಲಾಗುವ, ಪ್ರಕೃತಿ ತುಂಬು ಹೃದಯದಿಂದ ಹರಸಿದ ಕೇರಳದಲ್ಲಿ ಜನಿಸಿದ ಆದಿ ಶಂಕರಾಚಾರ್ಯರ ಸೌಂದರ್ಯ ಲಹರಿಗೆ ಪ್ರೇರಣೆ. ಸೌಂದರ್ಯ ಲಹರಿಯನ್ನು ಶ್ರೀವಿದ್ಯಾ ಉಪಾಸನೆಯ ಸಾರ ಎಂದು ಬಗೆಯಲಾಗುತ್ತದೆ. ಹೀಗಾಗಿ ಸೌಂದರ್ಯ ಅನ್ನುವುದನ್ನು ತೀರಾ ಕ್ಷುಲ್ಲಕ ವಿಷಯವೆಂದು ತಳ್ಳಿ ಹಾಕುವಂತಿಲ್ಲ. ಅದು ಅಧ್ಯಾತ್ಮಕ್ಕೂ ಸೋಪಾನವಾಗಬಲ್ಲುದು.

ಸೌಂದರ್ಯವರ್ಧಕ ಉದ್ಯಮ ಕೋಟಿಗಟ್ಟಲೆ ಬೆಲೆಯುಳ್ಳದ್ದು. ಸೌಂದರ್ಯ ಅನ್ನುವುದು ನಮ್ಮ ಪಾಲಿಗೆ ಏನೇ ಆಗಿರಲಿ, ಸೌಂದರ್ಯವರ್ಧಕ ಉದ್ಯಮದ ಜೀವಾಳ ನಮ್ಮ ಸೌಂದರ್ಯ ಪ್ರಜ್ಞೆ. ಅದನ್ನು ಜೀವಂತವಾಗಿಡುವುದು, ಕೆರಳಿಸುವುದು ಅವರ ದಂಧೆಯ ಒಂದು ಭಾಗ. ವಿಪರ್ಯಾಸವೆಂದರೆ ಅವರ ಹುನ್ನಾರಗಳು ಸೌಂದರ್ಯ ಅಂದರೆನೇ ರೇಜಿಗೆ ಹುಟ್ಟಿಸುವಷ್ಟು ವ್ಯತಿರಿಕ್ತ ಪರಿಣಾಮ ಬೀರುವುದು.

  ಸೌಂದರ್ಯ ಸ್ಪರ್ಧೆಗಳಲ್ಲಿ ಈ ಉದ್ಯಮಗಳÀ ಹಿತಾಸಕ್ತಿ ಅಡಗಿದೆ ಎಂಬುದು ಸುಸ್ಪಷ್ಟ. ಅವುಗಳ ಸ್ಪೋನ್ಸರ್ ಗೆ, ಅವುಗಳ ಸ್ಪರ್ಧಾಳುಗಳು ತಮ್ಮ ಸಿದ್ಧತೆಗೆ ಸುರಿಯುವ ಹಣಕ್ಕೆ ಪಾರವೇ ಇಲ್ಲ. ‘ಮಿಸ್ ಇಂಡಿಯಾ’ವೂ ಸೇರಿ ಪ್ರತಿ ವರ್ಷ ವಿಶ್ವದಾದ್ಯಂತ ನೂರಾರು ಸೌಂದರ್ಯ ಸ್ಪರ್ಧೆಗಳು ಜರಗುತ್ತವೆಯಾದರೂ, ಅವುಗಳಲ್ಲಿ ಅತಿ ಪ್ರತಿಷ್ಠೆಯವು ‘ಬಿಗ ಫೋರ್’ ಎಂದು ಕರೆಸಿಕೊಳ್ಳುವ  ಮಿಸ್  ವರ್ಲ್ಡ್, ಮಿಸ್   ಯೂನಿವರ್ಸ್ , ಮಿಸ್ ಇಂಟರ್ ನ್ಯಾಷನಲ್ ಹಾಗೂ ಮಿಸ್ ಅರ್ಥ್. ಆಂದ ಹಾಗೆ ಸೌಂದರ್ಯ ಸ್ಪರ್ಧೆಗಳಲ್ಲಿ ಪುರುಷರಿಗೆ ಆದ್ಯತೆ ಇಲ್ಲ, ಸೀಮಿತ ಅವಕಾಶ ಅಷ್ಟೆ!

ಈ ಸೌಂದರ್ಯ ಮೀಮಾಂಸೆಯಿಂದ ಪ್ರಾಣಿಗಳನ್ನೂ ಬಾಕಿ ಮಾಡಿಲ್ಲ ಮಾನವ. ಡಾಗ್ ಶೋನಿಂದ ಹಿಡಿದು ಒಂಟೆಗಳ ಸೌಂದರ್ಯ ಸ್ಪರ್ಧೆಗಳು ಎಲ್ಲಡೆ ಜರಗುತ್ತವೆ. ಅಚ್ಚರಿಯ ಸಂಗತಿಯೆಂದರೆ ಇಲ್ಲೊಂದು ಬಸವನ ಹುಳು ಜರ್ಮನ್‍ನ ಕೆಲವು ಪ್ರಕೃತಿ ಸಂಶೋಧನೆ, ಜೀವವೈವಿಧ್ಯ ಹಾಗೂ ಮೃದ್ವಂಗಿ ಸಂಶೋಧನೆಗೆ ಸಂಬಂಧಿಸಿದ ಸಂಘ ಸಂಸ್ಥೆಗಳು ಒಟ್ಟಾಗಿ ಆಯೋಜಿಸಿದ ‘ಮಲಾಸ್ಕ್ ಆಫ್ ದ ಯೀಯರ್’ (ವರ್ಷದ ಮೃದ್ವಂಗಿ) ಸ್ಪರ್ಧೆಯಲ್ಲಿ, ಸಾರ್ವಜನಿಕರು ಹಾಕಿದ ವೋಟಿನ ಬಲದಿಂದ ಪ್ರಥಮ ಬಹುಮಾನ ಪಡೆದಿರುವುದು.

ಸುಮಾರು 500 ದಶಲಕ್ಷ ವರ್ಷಗಳ ಹಿಂದೆ ವಿಕಾಸಗೊಂಡಿತು ಎಂದು ಬಗೆಯಲಾಗುವ ಈ ಪ್ರಭೇದ ತನ್ನ ಪ್ರೇಮ ಬಾಣ (ಲವ್ ಡಾರ್ಟ್-ಸಮಾಗಮದ ಸಂದರ್ಭದಲ್ಲಿ ಗಂಡು ಹೆಣ್ಣು ಪರಸ್ಪರ ಎಸೆಯುವ ಬಾಣದಂಥ ಅಸ್ತ್ರ)ಕ್ಕೆ ಹೆಸರುವಾಸಿ. ಕ್ಯಾಬಾದಲ್ಲಿ ಮಾತ್ರ ಕಂಡುಬರುವ, ‘ಪೋಲಿಮಿಟ ಪಿಕ್ಟ’(ಪಿ. ಪಿಕ್ಟ) ಹೆಸರಿನ ಈ ಬಸವನ ಹುಳುವಿಗೆ ಅದರ ಮೇಲಿನ ವರ್ಣಮಯ ಚಿತ್ತಾರದ ಚಿಪ್ಪಿ(ಶಂಖ)ನಿಂದಾಗಿ ಎಲ್ಲೆಲ್ಲೂ ಭಾರೀ ಬೇಡಿಕೆ. ಆಭರಣವಾಗಿ ಬೆಲೆಬಾಳುವುದರಿಂದ ಅದರ ಶಂಖವೇ ಅದಕ್ಕೆ ಮುಳುವಾಗಿದೆ, ಅದು ನಶಿಸಿಹೋಗುವ ಸಂತತಿಗೆ ಸೇರ್ಪಡೆಯಾಗಿದೆ.

ಮನುಕುಲಕ್ಕೆ ಅರಿವಿಗೆ ಬಂದ ಸುಮಾರು 1,20,000 ದಷ್ಟು ಮೃದ್ವಂಗಿಗಳ ಪ್ರಭೇದದಲ್ಲಿ, ಕೇವಲ ಕೆಲವನ್ನು ಮಾತ್ರ ಅಧ್ಯಯನ ಮಾಡಲಾಗಿದೆಯಂತೆ. ವಿಜ್ಞಾನಿಗಳು ಈಗ ಈ ಪಿ. ಪಿಕ್ಟ ಬಸವನಹುಳುವಿನÀ ಜಿನೋಮ್ ಸೀಕ್ವೆನ್ಸಿಂಗ್ ನಡೆಸುತ್ತಿದ್ದಾರೆ.

ಕಳೆದ ಬಾರಿ ಇದೇ ‘ವರ್ಷದ ಮೃದ್ವಂಗಿ’ ಸ್ಪರ್ಧೆಯಲ್ಲಿ ಪ್ರಥಮ ಬಹುಮಾನ ಪಡೆದದ್ದು ಒಂದು ಅಕ್ಟೋಪಸ್. ತನ್ನ ಬೇಟೆಯನ್ನು ಕಚ್ಚಿಹಿಡಿದು ವಿಷವನ್ನು ಅದರೊಳಗೆ ಸ್ರವಿಸುವ ಪ್ರಾಣಿ ಅದು. ಈ ಬಾರಿ ಗೆದ್ದದ್ದು ಪ್ರೇಮಬಾಣ ಪ್ರವೀಣ!

ಸೌಂದರ್ಯ ನೋಡುಗರ ಕಣ್ಣಲ್ಲಿ ಅಡಗಿದೆ ಅನ್ನುತ್ತಾರೆ ಬಲ್ಲವರು. ಜಿರಲೆ, ಕಾಗೆಗಳಿಗೆ, ಇಲಿಗಳಿಗೆ ಇಂಥಾ ಸ್ಪರ್ಧೆಯ ಭಾಗ್ಯ ಎಂದಾದರೂ ಪ್ರಾಪ್ತವಾದೀತೆ?